ओमित्येतदक्षरम्

माण्डूकोपनिषद्भाष्यम्

हरि: ओम्

॥ श्रीमद्धनुमद्भीममध्वान्तर्गतरामकृष्णवेदव्यासात्मकलक्ष्मीहयग्रीवाय नमः ।।

उपनिषत्

ॐ॥ पूर्णानन्दज्ञानशक्तिस्वरूपं नित्यमव्ययम् ।

चतुर्द्धा सर्वभोक्तारं वन्दे विष्णुं परं पदम् ।।

मण्डूकरूपिणा वरुणेन चतूरूपो नारायणः स्तूयते ।

'ध्यायन्नारायणं देवं प्रणवेन समाहितः ।

मण्डूकरूपी वरुणस्तुष्टाव हरिमव्ययम्' इति पाझे ॥

'ओमित्युक्तं तु यद् ब्रह्म तदक्षरमुदाहृतम् ।

ओतमत्र जगद् यस्मादों तस्माद् भगवान् हरिः ॥

' तदिदं गुणपूर्त्यैव सर्वमित्येव शब्दितम् ।

भाविभूतभवत्कालेष्वेकरूपतया हरिः ।

सर्वदा नित्य इत्येषा व्याख्योङ्कारस्य कीर्त्तिता ॥ '

इति बृहत्संहितायाम् ॥

'ओमित्याक्रियते यस्मादोङ्कारोऽसावतः परः ।

सर्वत्वमिति पूर्णत्वं तन्नान्यस्य हरेः क्वचित् ॥'

इति नैर्गुण्ये ॥

सर्वमोङ्कार एवेत्यन्यस्य पूर्णत्वनिवारणम् । त्रिकालातीतत्वं च तस्यैव । प्रकृतेरपि त्रिकालातीतत्वं विद्यत इति अन्यदिति विशेषणम् ॥