|| श्री दिग्विजयरामो विजयते ॥

भगवतो निर्दोषत्वलक्षणम्

अनन्तगुणसम्पूर्णं सर्वदोषविवर्जितम् ।

मूलरामं सदा वन्दे चतुरानन पूजितम् ॥ १ ॥

यद्भूविभ्रममात्रं हि जगत्सृष्ट्यादिकारणम् ।

रामं दिग्जयिनं वन्दे दुर्वादिजयसिद्धये ॥ २ ॥

परैरारोपितान्दोषान् संखण्ड्य श्रुतिभिहरेः ।

निर्दोषत्वं स्थापयन्तं मध्वाय नौमि संविदे ॥ ३ ॥

यत्कृपालेशमात्रेण पुरुषार्थचतुष्टयम् ।

लभन्ते सुजना वन्दे तं जयार्यगुरूत्तमम् || ४ ||

पञ्चाभिनवकृत्सत्यनाथपादरजः श्रये ।

तत्कृतिप्रतिपाद्यार्थयथार्थज्ञानसिद्धये ॥ ५ ॥

व्याख्यानैरवगाह्य यस्य सुकृतीः सच्छास्त्रतीर्थापगाः ।

सम्प्राप्ताः कृतकृत्यतां सुविमलाः सत्याभिनूत्नादयः ||

तेऽमी योगिवराः सुपूज्यचरणाः संवन्दिताः सादरम् ।

सन्दध्युर्मयि सत्यनाथसुकृतेर्भावावबोधं शुभम् ॥ ६ ॥

आनन्दतीर्थसत्कीर्तेः स्मारकं चरितैः स्वकैः ।

संसेभिऽमिनवानन्दतर्थम् सध्यानयोगिपम् ॥ ७ ॥

श्री सत्यप्रज्ञतीर्थार्यपादपङ्कजपांसवः ।

प्रपुनन्तु पटीयांसः पापपञ्जरपाटने ॥ ८ ॥

यस्य कारुण्यसरणिम् सत्याभिज्ञमुनीशितुः ।

प्रपन्न इत्यहं मान्यः सेवे तच्चरणौ सदा ॥ ९ ॥

श्रीश्रीनिवासतीर्थोक्तनिर्दोषत्व परिष्कृतेः ।

संशुद्धि मूलसम्मत्या वक्ष्यामि गुरुतुष्टये ॥ १० ॥

यत्र क्वापि विरुद्धेव प्राचामुक्ति: प्रदृश्यते ।

प्रौढ्यैव सा न सिद्धान्तोक्तिरित्येतच्च प्रदर्श्यते ॥ ११ ॥